ଓଡ଼ିଆ ବାର୍ତ୍ତା/ ଭୁବନେଶ୍ୱର (କୃଷ୍ଣ କୁମାର ମହାନ୍ତି): ‘ଟାଇମପାସ’ ପ୍ରକାଶନ ସଂସ୍ଥା ପକ୍ଷରୁ ସ୍ଥାନୀୟ ବୁଦ୍ଧମନ୍ଦିର ସଭାଗୃହରେ ଆୟୋଜିତ ପଞ୍ଚମ ‘ବହିବର୍ଷା’ରେ ଲୋକାର୍ପିତ ହୋଇଯାଇଛି ତେରଟି ନୂତନ ପୁସ୍ତକ। ବର୍ଷଣମୁଖର ସଂଧ୍ୟାରେ ଅନୁଷ୍ଠିତ ଏହି ମାରାଥନ୍ ପୁସ୍ତକ ଲୋକାର୍ପଣ ଉତ୍ସବକୁ ଶଙ୍ଖହୁଳହୁଳି ନାଦରେ ନଡ଼ିଆ ଭାଙ୍ଗି ଉଦ୍ଘାଟନ କରିଥିଲେ ଦୀର୍ଘ ଚାଳିଶ ବର୍ଷ ଧରି ହିମାଳୟ ଗିରିଶୃଙ୍ଗରେ ଟ୍ରେକିଂ କରିଥିବା ସମ୍ବଲପୁରର ବରିଷ୍ଠ ଲେଖକ ଧ୍ରୁବପ୍ରସାଦ ପଣ୍ଡା। କବିତା ବିଭାଗରେ ଡ. ପ୍ରସନ୍ନ କୁମାର ମହାନ୍ତିଙ୍କ ‘ଶ୍ରେଷ୍ଠ କବିତା’, ଡ. ସଂଗ୍ରାମ ଜେନାଙ୍କ ‘ଶ୍ରେଷ୍ଠ କବିତା’, ପ୍ରଜ୍ଞାଶ୍ରୀ ରଥଙ୍କ ‘ତୁମକୁ ମୁଁ ଗଢେ’, କମଳ କୁମାର ମହାନ୍ତିଙ୍କ ‘ସତସବୁ ସ୍ୱପ୍ନ ଯେମିତି’, ଶତ୍ରୁଜିତଙ୍କ ‘ପ୍ରେମ ହେଇଯାଏ’; ପ୍ରୀତିପଦ୍ମା ଦାସଙ୍କ ସଂପାଦିତ ‘ଗାଆଁ’, ସରୋଜ ବଳଙ୍କ ସଂପାଦିତ ‘ଦେଶ’ ଆଦି ଲୋକାର୍ପିତ ହୋଇଥିବାବେଳେ ଗଳ୍ପରେ ସୁପ୍ରିୟା ପଣ୍ଡାଙ୍କ ‘କଫି ହାଉସ’ ଓ ସୀତେଶ ତ୍ରିପାଠୀଙ୍କ ସଂପାଦିତ ‘ଆତଙ୍କ’; ପ୍ରବନ୍ଧରେ ଧ୍ରୁବପ୍ରସାଦ ପଣ୍ଡାଙ୍କ ‘ହିମାଳୟର ସନ୍ଥସ୍ପନ୍ଦନ’, ଡ. ପ୍ରମୋଦିନୀ ହୋତାଙ୍କ ‘ବଣ୍ଡା: ସିନ୍ଧେବରର ଅକୁହା କଥା’ ଏବଂ ଉପନ୍ୟାସରେ ଭୁବନେଶ୍ୱରୀ ପଣ୍ଡାଙ୍କ ‘ମାୟା ପରଦା’, ଶର୍ମିଷ୍ଠା ମହାନ୍ତିଙ୍କ ‘ଲାପତ୍ତା’ ଆଦି ପୁସ୍ତକ ଉନ୍ମାଚିତ ହୋଇଥିଲା। ଉତ୍ସବରେ ଅଧ୍ୟକ୍ଷତା ଓ ସଂଚାଳନ କରିଥିବା ‘ଟାଇମପାସ୍’ର ନିର୍ଦ୍ଦେଶକ ସରୋଜ ବଳ ଲେଖକମାନଙ୍କୁ ମିଠା ଖୁଆଇ ଓ ଉପହାର ଦେଇ ସ୍ୱାଗତ କରିଥିଲେ। ଲେଖକମାନେ ସେମାନଙ୍କ ପୁସ୍ତକ ପଛର ରହସ୍ୟ ବିଷୟରେ ବର୍ଣ୍ଣନା କରିବା ସହ ପ୍ରଥମ ଗ୍ରାହକଙ୍କ ପୁସ୍ତକରେ ଅଟୋଗ୍ରାଫ୍ ପ୍ରଦାନ କରିଥିଲେ। ପରିଚାଳନାରେ ସହଯୋଗ କରିଥିଲେ ବିଭୂତି ଖୁଣ୍ଟିଆ, ତିଳୋତ୍ତମା ଦାସ, ପ୍ରିୟାଂଶୁ ପ୍ରିୟଦେବ, ସୋନମ ଦାସ, ଶୁଭଶ୍ରୀ ସାହୁ, ସୁବ୍ରତ ମହାନ୍ତି, ସମ୍ବିତ ଲେଙ୍କା ଓ ସମାସ ବଳ। ଶତାଧିକ ଲେଖକ ଓ ପାଠକ ‘ବହିବର୍ଷା’ରେ ଯୋଗଦେଇ ଏହାକୁ ସଫଳ କରିଥିଲେ।
