୫ବର୍ଷ ପରେ ବି ମିଳିନି ଜିଲ୍ଲାପାଳଙ୍କ ଅଫିସ ଗୃହ ନିର୍ମାଣ ପ୍ରାପ୍ୟ

୫୦ ଲକ୍ଷର ବକେୟା ପ୍ରାପ୍ୟ ପାଇନଥିବା ଅଭିଯୋଗ ଆଣିଲେ ଠିକାଦାର

ରାଜ୍ୟ ସରକାର ଦୃଷ୍ଟି ଦିଅନ୍ତୁ

ନୂଆପଡ଼ା,୧/୨ : ସରକାରୀ କଳର ଉଦାସିନତା ଓ ଖାମଖିଆଲ୍ ଗୁଣର ଏକ ନିଚ୍ଛକ ଚିତ୍ର ଦେଖିବାକୁ ମିଳିଛି ନୂଆପଡାରେ । ୨୦୧୨ ମସିହାରେ ନୂଆପଡ଼ା ସଦର ମହକୁମାରେ ନିର୍ମାଣ ହୋଇଥିଲା ଅତ୍ୟାଧୁନିକ ଜିଲ୍ଲାପାଳଙ୍କ ଅଫିସ କୋଠାଗୃହ । ଏହା ଥିଲା ରାଜ୍ୟର ଏକ ନମ୍ବର ଜିଲ୍ଲାପାଳ ଅଫିସ । ତେବେ ବଷେ କି ଦୁଇ ବର୍ଷ ନୁହେଁ ୫ ବର୍ଷ ବିତି ଯାଇଥିଲେ ବି ସମ୍ପୃକ୍ତ ଠିକାଦାରଙ୍କୁ ତାଙ୍କର ପ୍ରାୟ ୫୦ ଲକ୍ଷର ବକେୟା ପ୍ରାପ୍ୟ ମିଳିନଥିବା ଭଳି ଏକ ଚାଞ୍ଚଲ୍ୟକର ଅଭିଯୋଗ ଆଣିଛନ୍ତି ସମ୍ପୃକ୍ତ ଠିକାଦାର ନରେଶ ଅଗ୍ରୱାଲ । ଏହି ଖବର ପ୍ରସାରିତ ହେବା ପରେ ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି ।  

ସ୍ଥାନୀୟ ହୋଟେଲ ମେଘାରେ ଏକ ସମ୍ବାଦିକ ସମ୍ମଳନୀରେ ସମ୍ପୃକ୍ତ ଠିକାଦାର ଶ୍ରୀ ଅଗ୍ରୱାଲ ସୂଚନା ଦେଇଛନ୍ତି ଯେ, ୨୦୧୨ରେ ସଦର ମହକୁମାରେ ଅତ୍ୟାଧୁନିକ ଜ୍ଞାନ କୌଶଳରେ ଜିଲ୍ଲାପାଳଙ୍କ ଅଫିସ ଗୃହ ନିର୍ମାଣ ପାଇଁ ଟେଣ୍ଡର ବାହାରି ଥିଲା । ଏହାର ଅଟକଳ ରାଶି ୧ କୋଟି ୬୭ ଲକ୍ଷ ରହିଥିବା ବେଳେ ନିର୍ମାଣ ପାଇଁ ବଲାଙ୍ଗୀର ଜିଲ୍ଲା ବେଲଗାଁର ଡିକେ ଇଂଜିନିୟରିଂ ଓ କନ୍ଷ୍ଟ୍ରକସନକୁ ନିର୍ମାଣ କାମ ଦାୟିତ୍ୱ ମିଳିଥିଲା । ସେହି ସମୟରେ ତତ୍କାଳିନ ଜିଲ୍ଲାପାଳ ଙ୍କ ଅଧ୍ୟକ୍ଷତା ଗୃହ ଓ ପୂର୍ତ୍ତ ବିଭାଗ ଅଧିକାରୀଙ୍କୁ ନେଇ ଅଫିସକୁ ଅଧିକ ସୁନ୍ଦର ଓ ଆକର୍ଷଣୀୟ କରିବାକୁ ଯୋଜନା ହୋଇଥିଲା । ଅଫିସରେ ଉନ୍ନତ ମାନର ଟାଇଲ୍ସ, ସିଲିଂ, ୱାଟର ପ୍ରୁଫ୍ କଲର ପେଣ୍ଟ(ପୁଟି), ଗ୍ଲେଜିଂ ଗ୍ଲାସ(ଏସିପି) ଲାଗିବା ସହ ଅଫିସ ସମ୍ମୁଖରେ ଟେପ୍ପର(ପଟିକ) ବାହାର କରି ଅଧିକ ଆକର୍ଷଣୀୟ କରିବାକୁ ବୈଠକରେ ଡେଭିଏସନ ପାସ ହୋଇଥିଲା । ଏଥିରେ ଅଟକଳ ବ୍ୟାୟ ଠାରୁ ଆହୁରୀ ୫୦ ଲକ୍ଷ ଅଧିକ ଖର୍ଚ୍ଚ ଆକଳନ ହୋଇଥିଲା । ଜିଲ୍ଲାପାଳ ଓ ପୂର୍ତ୍ତ ଓ ଗୃହ ନିର୍ମାଣ ବିଭାଗର ଅନୁମତି କ୍ରମେ ସମ୍ପୃକ୍ତ ଠିକାଦାର କାମ ସମ୍ପୁର୍ଣ୍ଣ କରିଥିଲେ । ରାଜ୍ୟରେ ପ୍ରଥମ କରି ଅତ୍ୟାଧୁନିକ ଓ ଆକର୍ଷଣୀୟ ଜିଲ୍ଲାପାଳ ଅଫିସ ନିର୍ମାଣ ହୋଇଥିଲା । ୨୦୧୪ ଜାନୁୟାରୀ ୨୯ ତାରିଖରେ ନିର୍ମାଣ କାମ ସମ୍ପୁର୍ଣ୍ଣ ହୋଇଥିବା ବେଳେ ଫେବୃୟାରୀ ୨୦ ତାରିଖରେ କୋଠାଗୃହ ହସ୍ତାନ୍ତର ହୋଇଥିଲା । ସେହି ବର୍ଷ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନବ ନିର୍ମିତ କୋଠା ଗୃହକୁ  ଉଦ୍ଘାଟନ କରିଥିଲେ । ପରେ ସମ୍ପୃକ୍ତ ଠିକାଦାର ନିଜ କାମ କରିଥିବା ପାଉଣା ପାଇଁ ବିଭାଗୀୟ ଅଧିକାରୀ, ଜିଲ୍ଲାପାଳଙ୍କୁ ଅନୁରୋଧ କରିଥିଲେ । ବାରମ୍ବାର ବିଭାଗୀୟ ଅଫିସକୁ ଯିବା ଆସିବା କରି ନୟାନ୍ତ ହୋଇଥିଲେ ମଧ୍ୟ ତାଙ୍କର ପାଉଣା ମିଳିନଥିଲା । ବିଭାଗୀୟ ଅଧିକାରୀ ମାନେ ସମ୍ପୃକ୍ତ ଠିକାଦାରଙ୍କୁ ଦିନ ଗଡାଇ ଭୁଆଁ ବୁଳାଇ ଚାଲିଥିଲେ । ତତକାଳିନ ଜିଲ୍ଲାପାଳ ଭି. ଜୟକୁମାରଙ୍କ ସମୟରେ ପୂର୍ତ୍ତ ଓ ଗୃହ ନିର୍ମାଣ, ଗ୍ରାମ୍ୟ ଉନ୍ନୟନ ଓ ଗ୍ରାମ୍ୟ ଜଳ ଯୋଗାଣ ବିଭାର ଭଳି ତିନୋଟି ବିଭାଗର ନିର୍ବାହୀ ଯନ୍ତ୍ରୀଙ୍କୁ ନେଇ ଏକ କମିଟି ଗଠନ କରି ନିର୍ମାଣ କାମର ତଦନ୍ତ କରିଥିଲେ । ସେହି ସମୟରେ ୪୦ ଲକ୍ଷରୁ ଉର୍ଦ୍ଧ ଟଙ୍କା ଖର୍ଚ୍ଚ ହୋଇଥିବା କମିଟି ରିପୋର୍ଟ ଦେଇଥିଲା । ଏହାର ସଠିକ ଅଟକଳ ମୁଲ୍ୟ ଆକଳନ କରି ସମ୍ପୃକ୍ତ ଠିକାଦାରଙ୍କୁ ତାଙ୍କର ପ୍ରାପ୍ୟ ପ୍ରଦାନ କରିବାକୁ ଜିଲ୍ଲାପାଳ ନିର୍ଦ୍ଦେଷ ଦେଇଥିଲେ । ଜିଲ୍ଲାପାଳଙ୍କ ନିର୍ଦ୍ଦେଷ ସତ୍ତ୍ବେ ବିଭାଗୀୟ ଅଧିକାରୀଙ୍କ ଖାମଖିଆଲି ମନୋଭାବ ଯୋଗୁଁ ଠିକାଦାରଙ୍କୁ ପ୍ରାପ୍ୟ ମିଳିନଥିଲା । ପରେ ସମ୍ପୃକ୍ତ ଠିକାଦାର କୋର୍ଟର ଆଶ୍ରୟ ନେଇଥିଲେ । କୋର୍ଟ ତରଫରୁ ମଧ୍ୟ ଉଭୟ ପକ୍ଷ ବୁଝାମଣା କରିବାକୁ ନିର୍ଦ୍ଦେଷ ଦେଇଛନ୍ତି । ହେଲେ କୌଣସି ସମାଧାନ ହୋଇ ପାରିନାହିଁ ।

ଏବେ ମୁଖ୍ୟମନ୍ତ୍ରୀ ଭୋଟ ରାଜନିତି କରି ଲୋକଙ୍କ ପ୍ରିୟ ଭାଜନ ହେବାକୁ ଗୋଟିଏ ପରେ ଗୋଟିଏ ପ୍ରକଳ୍ପକୁ ଉଦଘାଟନ କରୁଛନ୍ତି । ହେଲେ ଠିକାଦାରଙ୍କୁ ବର୍ଷ ବର୍ଷ ଧରି କାମ କରିବାର ପାଉଣା ମିଳୁନଥିଲେ ବି ସରକାର କିମ୍ବା ଜିଲ୍ଲା ପ୍ରଶାସନ ଧ୍ୟାନ ଦେଉନଥିବା ସମ୍ବାଦିକ ସମ୍ମିଳନୀରେ ଶ୍ରୀ ଅଗ୍ରୱାଲ ଅଭିଯୋଗ କରିଛନ୍ତି । ଆଜି ଠାରୁ ପୂର୍ତ୍ତ ଓ ଗୃହ ନିର୍ମାଣ ବିଭାଗ ସହକାରୀ ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିବେ ଓ ତାଙ୍କୁ ନ୍ୟାୟ ନ ମିଳିଲେ ଜିଲ୍ଲାପାଳ ଅଫିସ ସମ୍ମୁଖରେ ଅନସନରେ ବସି ଆତ୍ମହତ୍ୟା କରିବେ ବୋଲି ଜିଲ୍ଲା ପ୍ରଶାସନ ତଥା ରାଜ୍ୟ ସରକାରଙ୍କୁ ଚେତାବନୀ ଦେଇଛନ୍ତି ।

ନୂଆପଡାରୁ ମହେନ୍ଦ୍ର କୁମାର ବାଗ(ରାହୁଲ)ଙ୍କ ରିପୋର୍ଟ odiabarta.in