ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ଫେବୃଆରୀ ୧୪ ଭାଲେନଟାଇନ୍ ଡେ ବା ପ୍ରେମ ଦିବସ। ଏହି ଦିନ ଗୋ ଆଲିଙ୍ଗନ ଦିବସ ରୂପେ ପାଳନ କରିବାକୁ ଏକ ନୋଟିସ୍ ଜାରି ହୋଇଥିଲା ଦେଶର ପଶୁ କଲ୍ୟାଣ ବୋର୍ଡ ପକ୍ଷରୁ। ଯାହାକୁ କେନ୍ଦ୍ରମନ୍ତ୍ରୀ ଗିରିରାଜ ସିଂହ ମଧ୍ୟ ସମର୍ଥନ କରିଥିଲେ। ଏହାପରେ ବିବାଦ ଦେଖାଦେବା ପରେ ନୋଟିସ ପ୍ରତ୍ୟାହାର ହୋଇଛି। ଏବେ ପୂର୍ବତନ କେନ୍ଦ୍ରମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଜୟରାମ ରମେଶ ଟ୍ବିଟ୍ କରି ପଚାରିଛନ୍ତି, ଗୋ ଆଲିଙ୍ଗନ ଦିବସ ପାଳନ କରିବାକୁ ପ୍ରଥମେ କାହାର ମୁଣ୍ଡକୁ ଏ ବୁଦ୍ଧି ଆସିଥିଲା।
ଭାରତୀୟ ପଶୁ କଲ୍ୟାଣ ବୋର୍ଡ ଏହି ବିଜ୍ଞପ୍ତିକୁ ପ୍ରତ୍ୟାହାର କରି ନେଇଛି ଯେଉଁଥିରେ ୧୪ ଫେବୃଆରୀରେ ଗୋ ଆଲିଙ୍ଗନ ଦିବସ ପାଳନ କରିବାକୁ ଲୋକଙ୍କୁ ନିବେଦନ କରାଯାଇଥିଲା। ନୋଟିସରେ କୁହାଯାଇଛି ଯେ ଗା ଆଲିଙ୍ଗନ କରିବା ଦ୍ୱାରା “ଭାବପ୍ରବଣତା” ଆସିବ ଏବଂ “ସାମୂହିକ ସୁଖ” ବୃଦ୍ଧି ପାଇବ।
Who moo-ted the idea in the first place? https://t.co/QSFeLk79bO
— Jairam Ramesh (@Jairam_Ramesh) February 10, 2023
ବୁଧବାର ପଶୁ କଲ୍ୟାଣ ବୋର୍ଡ ଏକ ବିଜ୍ଞପ୍ତି ଜାରି କରି ଲୋକଙ୍କୁ ଫେବୃଆରୀ ୧୪ ରେ ଗୋ ଆଲିଙ୍ଗନ ଦିବସ ପାଳନ କରିବାକୁ କହିଥିଲା। ପ୍ରତିବର୍ଷ ୧୪ ଫେବୃଆରୀରେ ଭାଲେଣ୍ଟାଇନ୍ସ ଡେ ପାଳନ କରାଯାଏ। ପଶୁପାଳନ ଏବଂ ଦୁଗ୍ଧ ବିଭାଗ ଅଧୀନରେ ଆସିଥିବା ବୋର୍ଡର ବିଜ୍ଞପ୍ତିରେ କୁହାଯାଇଛି ଯେ ଗୋ ସେବାର ମହତ୍ତ୍ୱକୁ ମନେ ରଖି ଜୀବନକୁ ସୁଖ ଏବଂ ସକରାତ୍ମକ ଶକ୍ତିରେ ପରିପୂର୍ଣ୍ଣ କରିବାକୁ ସମସ୍ତ ଗୋ ପ୍ରେମୀ ଗୋ ଆଲିଙ୍ଗନ ଦିବସ ଫେବୃଆରୀ ୧୪ରେ ପାଳନ କରିପାରିବେ।
ବିଜ୍ଞପ୍ତିରେ ଆହୁରି ମଧ୍ୟ କୁହାଯାଇଛି ଯେ ପାଶ୍ଚାତ୍ୟ ସଂସ୍କୃତିର ଅଗ୍ରଗତି ହେତୁ ବୈଦିକ ପରମ୍ପରା ବିଲୁପ୍ତ ହେବାକୁ ଯାଉଛି ଏବଂ ପାଶ୍ଚାତ୍ୟ ସଭ୍ୟତା ଆମର ସଂସ୍କୃତି ଏବଂ ଐତିହ୍ୟକୁ ଭୁଲି ଯାଇଛି।
କେନ୍ଦ୍ର ଗ୍ରାମ୍ୟ ଉନ୍ନୟନ ମନ୍ତ୍ରୀ ଗିରିରାଜ ସିଂ ଗୁରୁବାର ଗୋ ଆଲିଙ୍ଗନ ଦିବସ ପାଳନ କରିବା ପାଇଁ ଭାରତର ପଶୁ କଲ୍ୟାଣ ବୋର୍ଡର ବିଜ୍ଞପ୍ତିକୁ ସମର୍ଥନ କରିଥିଲେ ଏବଂ ସମସ୍ତେ ଗାଈକୁ ଭଲ ପାଇବା ଉଚିତ ବୋଲି କହିଛନ୍ତି।
