ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ଖଲିସ୍ଥାନୀ ଆତଙ୍କୀ ହରଦୀପ ସିଂହ ନିଜ୍ଜର ହତ୍ୟା ଘଟଣାକୁ ନେଇ ଭାରତ-କାନାଡା ସମ୍ପର୍କରେ ତିକ୍ତତା ଆସିଥିବାବେଳେ କାନାଡା ପ୍ରଧାନମନ୍ତ୍ରୀ ଟ୍ରୁଡୋଙ୍କୁ ଲାଗିଛି ବଡ ଝଟକା । କାନାଡାର କନଜରଭେଟିଭ ପାର୍ଟିର ମୁଖ୍ୟ ତଥା ବିରୋଧୀ ଦଳ ନେତା ପିୟରେ ପୋଇଲିବ୍ରେ କହିଛନ୍ତି, ୮ ବର୍ଷ ଧରି କ୍ଷମତାରେ ରହିବା ପରେ ବି ପିଏମ ଜଷ୍ଟିନ ଟ୍ରୁଡୋ ଭାରତ ସହ ସମ୍ପର୍କର ମୂଲ୍ୟ ବୁଝି ପାରିଲେ ନାହିଁ । ସେ ଆହୁରି କହିଛନ୍ତି, ସେ କାନାଡାର ପ୍ରଧାନମନ୍ତ୍ରୀ ହେବା ପରେ ଭାରତ-କାନାଡା ସମ୍ପର୍କରେ ସୁଧାର ଆଣିବେ । ଏକ ସାକ୍ଷାତକାର ପିୟରେ ପୋଇଲିବ୍ରେ କହିଛନ୍ତି, ଭାରତ ସହ ଆମକୁ ପ୍ରଫେସନାଲ ସମ୍ପର୍କ ରଖିବାକୁ ପଡିବ । ଭାରତ ବିଶ୍ୱର ସବୁଠାରୁ ବଡ ଗଣତାନ୍ତ୍ରିକ ଦେଶ ଅଟେ । ଦୁଇ ଦେଶ ମଧ୍ୟରେ ଏପରି ଅସହମତି ପ୍ରକାଶ ପାଇପାରେ। କିନ୍ତୁ ଉଭୟ ଦେଶ ମଧ୍ୟରେ ବ୍ୟାବସାୟିକ ସମ୍ପର୍କ ରଖିବା ନିହାତି ଜରୁରୀ । କାନାଡାର ପ୍ରଧାନମନ୍ତ୍ରୀ ହେଲେ ଭାରତ ସହ ସମ୍ପର୍କରେ ସୁଧାର ଆଣିବି ବୋଲି କହିଛନ୍ତି କାନାଡା ବିରୋଧୀ ଦଳ ନେତା ପିୟରେ ପୋଇଲିବ୍ରେ କହିଛନ୍ତି । ଭାରତରୁ ୪୧ କୁଟନୀତିଜ୍ଞଙ୍କୁ ହଟାଇବା ବିଷୟରେ ଏକ ପ୍ରଶ୍ନର ଉତ୍ତର ଦେଇ ସେ କହିଛନ୍ତି, ଟ୍ରୁଡୋ ଅସମର୍ଥ ଏବଂ ପ୍ରଫେସନାଲ ନୁହଁନ୍ତି । କେବଳ ଭାରତ ନୁହେଁ,ବିଶ୍ୱର ଅନେକ ବଡ ବଡ ଦେଶ ସହ କାନାଡାର ମତଭେଦ ରହିଛି । ସେହିପରି କାନାଡାରେ ହିନ୍ଦୁ ମନ୍ଦିର ଭଙ୍ଗାରୁଜା କରୁଥିବା ଘଟଣା ଉପରେ ପ୍ରତିକ୍ରିୟା ରଖି ସେ କହିଛନ୍ତି, ହିନ୍ଦୁ ମନ୍ଦିର ଭଙ୍ଗାରୁଜା କରିବା ତଥା ହିନ୍ଦୁ ସମ୍ପତ୍ତିକୁ ନଷ୍ଟ କରୁଥିବା ବ୍ୟକ୍ତିଙ୍କ ବିରୋଧରେ ମାମଲା ରୁଜୁ କରିବା ଉଚିତ ।
