କଳାହାଣ୍ଡି, (ସୁଶାନ୍ତ କୁମାର ଦଳେଇ): କଳାହାଣ୍ଡି ଜିଲ୍ଲା ଗୋଲାମୁଣ୍ଡା ବ୍ଲକ ଅନ୍ତର୍ଗତ କଣ୍ଟାମାଳ ଗ୍ରାମରେ ଆଇଟିସି ମିଶନ ସୁନେହେରା କଲ ପ୍ରକଳ୍ପ ଆନୁକୁଲ୍ୟରେ ସ୍ବେଚ୍ଛାସେବୀ ସଂଗଠନ ସର୍ବ ସେବା ସମିତି ସଂସ୍ଥା ତରଫରୁ କୃଷକ ସମ୍ମିଳନୀ ଓ କ୍ଷେତ୍ର ପରିଦର୍ଶନ କାର୍ଯକ୍ରମ ଅନୁଷ୍ଠିତ ହୋଇଯାଇଛି । ଏଥିରେ ଗ୍ରାମ୍ୟ କୃଷୀ ସମ୍ପ୍ରସାରଣ ଅଧିକାରୀ ଗଣପତି ନାଏକ, ପ୍ରକଳ୍ପର ଜିଲ୍ଲା ସଂଯୋଜକ ପ୍ରଦ୍ୟୁମ୍ନ କୁମାର ସା ଯୋଗଦେଇ ଧାନ, କପା, ମୁଗ, ବିରି ଆଦି ପ୍ରମୁଖ ଫସଲରେ ବୈଜ୍ଞାନିକ ଚାଷ ପଦ୍ଧତି ଅବଲମ୍ବନ କରି କମ୍ ଖର୍ଚ୍ଚ ଓ ଅମଳ ବୃଦ୍ଧି କରିବା ଏବଂ ଏହି ଫସଲ ଗୁଡ଼ିକର ରୋଗ ପୋକ ନିୟନ୍ତ୍ରଣ, ଘାସ ଦମନ, ଖାଦ୍ୟସାର ପରିଚାଳନା ତଥା ସରକାରଙ୍କ ଦ୍ଵାରା କ୍ରିୟାଶୀଳ ବିଭିନ୍ନ କୃଷି ସମ୍ବନ୍ଧୀୟ ପରିଯୋଜନାର ଲାଭ ନେବା ଆଦି ବିଷୟରେ ବିସ୍ତୃତ ଆଲୋଚନା କରିଥିଲେ ।
ପରବର୍ତ୍ତୀ ପର୍ଯ୍ୟାୟରେ ଆଇଟିସି ମିଶନ ସୁନେହେରା କଲ୍ ପ୍ରକଳ୍ପ ତରଫରୁ ପରିଚାଳିତ କଣ୍ଟାମାଳ ଗ୍ରାମ କୃଷକ କ୍ଷେତ୍ର ବିଦ୍ୟାଳୟର ମୁଖ୍ୟ ଚାଷୀ ଚୈତନ୍ୟ ପୁଟେଲ ଙ୍କ କ୍ଷେତକୁ ଯାଇ ଚାଷୀମାନେ ପ୍ରଦର୍ଶନୀ କ୍ଷେତ୍ରକୁ ପରିଦର୍ଶନ କରିଥିଲେ । ଏଥିରେ କଣ୍ଟାମାଳ, ବୋରିଗୁମା ଏବଂ କୁହୁରା ଗ୍ରାମର ୪୦ ରୁ ଅଧିକ ଚାଷୀ ଉପସ୍ଥିତ ଥିଲେ । ଉକ୍ତ କାର୍ଯ୍ୟକ୍ରମକୁ ସର୍ବ ସେବା ସମିତି ସଂସ୍ଥାର କ୍ଷେତ୍ର ସଂଯୋଜକ ଭୋଳାମଣି ବାଗ୍ ଓ କୁବେର ବୁଡେକ୍ ପ୍ରମୁଖ ପରିଚାଳନା କରିଥିବାବେଳେ କିଶାନ ମିତ୍ର ଅବଧୂତ ମଝି ସହଯୋଗ କରିଥିଲେ ।
