ଓଡ଼ିଆ ବାର୍ତ୍ତା/ ମୁମ୍ବାଇ: ଆସନ୍ତା ବର୍ଷ ୨୦୨୪ ରାଜନୈତିକ ଦୃଷ୍ଟିକୋଣରୁ ବହୁତ ଆହ୍ବାନମୂଳକ ରହିବ। କାରଣ ଲୋକସଭା ନିର୍ବାଚନ ଅନୁଷ୍ଠିତ ହେବ। ଏହାପୂର୍ବରୁ ରାଜନୈତିକ ଦଳମାନେ ସେମାନଙ୍କର ରଣନୀତି ତିଆରି କରିବାରେ ଲାଗିଛନ୍ତି। ବିଭିନ୍ନ ସ୍ଥାନରେ ସଭା ସମିତି ହେଉଥିବା ବେଳେ ଘନ ଘନ ବୈଠକ ମଧ୍ୟ ହେଉଛି। ସାଧାରଣ ନିର୍ବାଚନ ପାଇଁ ଶାସକ ଦଳ ଅପେକ୍ଷା ବିରୋଧୀମାନେ ଅଧିକ ଏବେ ଆକ୍ରମଣାତ୍ମକ ଦେଖାଯାଉଛନ୍ତି। ଏଥର ଅନେକ ବିରୋଧୀ ଦଳ ଏକାଠି ହୋଇ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବେ ଏବଂ ଏହି କ୍ରମରେ ସମସ୍ତ ଦଳ ନିର୍ବାଚନ ପୂର୍ବରୁ ନିଜର ମତଭେଦ ଭୁଲିଯିବାକୁ ଚାହୁଁଛନ୍ତି। ଏହି ଅଭିଯାନ ଅଧୀନରେ ସୋମବାର କଂଗ୍ରେସର ସାଧାରଣ ସମ୍ପାଦକ କେ.ସି ଭେନୁଗୋପାଲ ପୂର୍ବତନ ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଭେଟିଛନ୍ତି। ରାଜ୍ୟସଭା ସାଂସଦ ସଞ୍ଜୟ ରାଉତ କହିଛନ୍ତି ଯେ ଏହି ବୈଠକରେ ବିରୋଧୀ ଏକତା ଉପରେ ଆଲୋଚନା ହୋଇଥିଲା। କେସି ଭେନୁଗୋପାଲ ସୋନିଆ ଏବଂ ରାହୁଲ ଗାନ୍ଧୀଙ୍କ ବାର୍ତ୍ତା ଦେଇଛନ୍ତି। ସେ କହିଛନ୍ତି ଯେ ୨୦୨୪ ମସିହାରେ ଗଣତନ୍ତ୍ର ଏବଂ ସମ୍ବିଧାନର ସୁରକ୍ଷା ପାଇଁ ଆମେ ଏକାଠି ନିର୍ବାଚନ ଲଢିବୁ। ଏଥିସହ ଉଦ୍ଧବ ଠାକରେ କହିଛନ୍ତି ଯେ ଏହି ସମୟରେ ଦେଶ ସାମ୍ନାରେ ଏକ ବଡ ସମସ୍ୟା ରହିଛି। ଆମେ ସମସ୍ତେ ଦେଶରେ ଅହଙ୍କାର ଆଦର୍ଶ ବିରୁଦ୍ଧରେ ଏକାଠି ହେଉଛୁ। ସେ କହିଛନ୍ତି ଯେ ବିଜେପି ସଭାପତି ଜେପି ନଡ୍ଡା କହିଛନ୍ତି ଯେ ସବୁ ଦଳ ଶେଷ ହୋଇଯିବ ଏବଂ କେବଳ ଗୋଟିଏ ଦଳ ରହିବ। ବିଜେପି ହେଉଛି ବିଭାଜନକାରୀ ଦଳ ଏବଂ ଏହା ହେଉଛି ସେମାନଙ୍କର ନୀତି। କିନ୍ତୁ ଗଣତନ୍ତ୍ରକୁ ବଞ୍ଚାଇବା ପାଇଁ ଆମେ ସମସ୍ତେ ଏକାଠି ଛିଡ଼ା ହେବୁ। ଠାକରେ କହିଛନ୍ତି ଯେ ଯେତେବେଳେ ଆମେ ବନ୍ଧୁତା ସ୍ଥାପନ କରୁ, ଆମେ କେବଳ ନାମର ନୁହେଁ ବନ୍ଧୁତ୍ୱର ସମ୍ପର୍କ ବଜାୟ ରଖୁ। ଆମେ ଏପର୍ଯ୍ୟନ୍ତ ଏକାଠି ଅଛୁ ଏବଂ ଆଗାମୀ ‘ଯୁଦ୍ଧ’ରେ ଆମେ ଏକାଠି ରହିବୁ। କେସି ଭେନୁଗୋପାଲ କହିଛନ୍ତି ଯେ ପ୍ରତ୍ୟେକ ରାଜନୈତିକ ଦଳର ନିଜର ମତ ରହିଛି। ହେଲେ ଏକାଠି ହେବାକୁ ଅନ୍ୟ ଦଳର ମତ ସହିତ ସମାନ ହେବ ବୋଲି କେଉଁଠି କୁହାଯାଇନି। ବିଭେଦ ରହିଛି କିନ୍ତୁ ଆମେ ସମସ୍ତେ ଦେଶକୁ ବଞ୍ଚାଇବା ପାଇଁ ଏକାଠି ହେଉଛୁ। ସେ କହିଛନ୍ତି ଯେ ଆମେ ଏକାଠି ୧୯-୨୦ ଦଳ ଏବଂ ସଂସଦରେ ମଧ୍ୟ ଏକାଠି ରଣନୀତି ପ୍ରସ୍ତୁତ କରୁଥିଲୁ। ଆମେ ଚାହୁଁଥିଲୁ ଗୃହ ଚାଲିବ ଏବଂ ଜେପିସି ପାଇଁ ଆମର ଦାବି ଥିଲା କିନ୍ତୁ ଶାସକ ଦଳ ଗୃହକୁ ଚାଲିବାକୁ ଦେଇନଥିଲେ। ସେ କହିଛନ୍ତି ଯେ ଆମେ ବିରୋଧୀ ଏକତା ଚାହୁଁ, ଯେଉଁଥିରେ ନୀତୀଶ କୁମାର ଏବଂ ଶରଦ ପାୱାରଙ୍କୁ ସମର୍ଥନ କରାଯିବ।
ତେବେ କେସି ଭେନୁଗୋପାଲ ଉଦ୍ଧବ ଠାକରେଙ୍କ ସମ୍ମୁଖରେ ଏକ ସର୍ତ୍ତ ରଖିଛନ୍ତି ଯେ ସେ ପ୍ରଥମେ ଦିଲ୍ଲୀ ଆସି ପୂର୍ବତନ କଂଗ୍ରେସ ସଭାପତି ସୋନିଆ ଗାନ୍ଧୀଙ୍କୁ ଭେଟିବେ। ଏହି ବୈଠକ ପରେ ହିଁ ରାହୁଲ ଗାନ୍ଧୀ ମୁମ୍ବାଇ ଆସି ଉଦ୍ଦବ ଠାକରେଙ୍କ ସମେତ ଅନ୍ୟ ନେତାମାନଙ୍କୁ ଭେଟିବେ।
