ଓଡ଼ିଆ ବାର୍ତ୍ତା/ ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି (ଗୁରୁବାର) ଫ୍ରାନ୍ସ ଏବଂ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ଅଭିମୁଖେ ଯାତ୍ରା ଆରମ୍ଭ କରିଛନ୍ତି। ସେ ଜୁଲାଇ ୧୩ ଓ ୧୪ ତାରିଖରେ ଫ୍ରାନ୍ସରେ ରହିବେ। ଆଜି ଅପରାହ୍ଣରେ ସେ ପ୍ୟାରିସରେ ପହଞ୍ଚିବେ। ଅନ୍ୟପକ୍ଷରେ, ଜୁଲାଇ ୧୫ ରେ ସେ ୟୁଏଇ ଗସ୍ତରେ ଯିବେ। ଏହି ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦୀ ଜୁଲାଇ ୧୪ରେ ଫ୍ରାନ୍ସର ବଷ୍ଟିଲ୍ ଡେ ପ୍ୟାରେଡ୍ କାର୍ଯ୍ୟକ୍ରମରେ ମଧ୍ୟ ଯୋଗଦେବେ। ଏଥି ସହିତ ଭାରତ ଏବଂ ଫ୍ରାନ୍ସ ମଧ୍ୟରେ ଏକ ଐତିହାସିକ ପ୍ରତିରକ୍ଷା ଚୁକ୍ତି ମଧ୍ୟ କରାଯିବ।
ଫ୍ରାନ୍ସର ରାଷ୍ଟ୍ରପତି ଇମାନୁଏଲ୍ ମାକ୍ରୋନ୍ଙ୍କ ନିମନ୍ତ୍ରଣ କ୍ରମେ ପ୍ରଧାନମନ୍ତ୍ରୀ ଦୁଇ ଦିନିଆ ଫ୍ରାନ୍ସ ଗସ୍ତ କରିଛନ୍ତି। ଶୁକ୍ରବାର ବଷ୍ଟିଲ୍ ଡେ’ ପ୍ୟାରେଡରେ ପ୍ରଧାନମନ୍ତ୍ରୀ ସମ୍ମାନିତ ଅତିଥି ଭାବରେ ଯୋଗଦେବେ। ସେଠାରେ ଭାରତୀୟ ସଶସ୍ତ୍ର ବାହିନୀ ପକ୍ଷରୁ ତିନିଟି ଦଳ ଅଂଶଗ୍ରହଣ କରିବେ। ଏହା ସହିତ ଭାରତୀୟ ସେନା ମଧ୍ୟ ଏହି ପ୍ୟାରେଡର ଏକ ଅଂଶ ହେବେ।
ମୋଦୀ ରାତି ପ୍ରାୟ ୪ ଟାରେ (ଭାରତୀୟ ସମୟ) ପ୍ୟାରିସରେ ପହଞ୍ଚିବେ, ଯେଉଁଠାରେ ତାଙ୍କୁ ଅର୍ଲି ବିମାନବନ୍ଦରରେ ସ୍ୱାଗତ କରାଯିବ। ଏଥି ସହିତ ସନ୍ଧ୍ୟାରେ ଫ୍ରାନ୍ସର ପ୍ରଧାନମନ୍ତ୍ରୀଙ୍କ ସହିତ ସିନେଟ ଏବଂ ଫ୍ରାନ୍ସର ନେସନାଲ ଆସେମ୍ଳିର ସଭାପତିଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି। ଏହା ପରେ ପ୍ରଧାନମନ୍ତ୍ରୀ ରାତି ୧୧ ଟାରେ ସମ୍ମାନଜନକ ଲା ସେନ୍ ମ୍ୟୁଜିକାଲ୍ ଷ୍ଟାଡିୟମରେ ଭାରତୀୟ ସମ୍ପ୍ରଦାୟର ଲୋକଙ୍କୁ ସମ୍ବୋଧିତ କରିବେ। ଏଠାରୁ ସେ ରାଷ୍ଟ୍ରପତି ଇମାନୁଏଲ୍ ମାକ୍ରନଙ୍କ ଦ୍ୱାରା ଆୟୋଜିତ ଏକ ଘରୋଇ ରାତ୍ରୀ ଭୋଜନ ପାଇଁ ଏଲିସି ପ୍ୟାଲେସ ପହଞ୍ଚିବେ।
ଚଳିତ ବର୍ଷ ଭାରତ-ଫ୍ରାନ୍ସ ରଣନୀତିକ ସହଯୋଗର ୨୫ତମ ବାର୍ଷିକୀ ପାଳନ କରାଯାଉଛି। ତେଣୁ ପ୍ରଧାନମନ୍ତ୍ରୀଙ୍କ ଗସ୍ତ ଭବିଷ୍ୟତ ପାଇଁ ରଣନୀତିକ, ସାଂସ୍କୃତିକ, ବୈଜ୍ଞାନିକ, ଶିକ୍ଷା ଏବଂ ଅର୍ଥନୈତିକ ସହଯୋଗ ଭଳି ବିଭିନ୍ନ କ୍ଷେତ୍ରରେ ସହଭାଗିତାର ରୂପରେଖ ପ୍ରସ୍ତୁତ କରିବାର ସୁଯୋଗ ପ୍ରଦାନ କରିବ। ଅନ୍ୟପକ୍ଷରେ, ଏହି ସମୟରେ ପ୍ୟାରିସର ଏଲିସି ରାସ୍ତାରେ ଏକ ସାମରିକ ପରେଡ ଆୟୋଜନ କରାଯାଇଛି। ବିଶେଷ କଥା ହେଉଛି ଭାରତୀୟ ସେନାର ସମସ୍ତ ତିନୋଟି କଣ୍ଟିଜେଣ୍ଟ ଯଥା ସେନା, ନୌସେନା ଏବଂ ବାୟୁସେନା ମଧ୍ୟ ଏଥିରେ ଭାଗ ନେଉଛନ୍ତି। ଏହା ବ୍ୟତୀତ ଫ୍ରାନ୍ସରୁ କିଣାଯାଇଥିବା ତିନୋଟି ରାଫାଲ୍ ଜେଟ୍ ମଧ୍ୟ ସେମାନଙ୍କର ଏରିଲ୍ ଷ୍ଟଣ୍ଟ୍ ଦେଖାଇବେ।
ବଷ୍ଟିଲ୍ ଡେ କାର୍ଯ୍ୟକ୍ରମ ପରେ ପ୍ରଧାନମନ୍ତ୍ରୀଙ୍କ ପାଇଁ ଏକ ରିସେପ୍ସନ୍ ହେବ। ଏହା ପରେ ମୋଦୀ ଏବଂ ଫ୍ରାନ୍ସର ରାଷ୍ଟ୍ରପତି ଇମାନୁଏଲ ମାକ୍ରୋନଙ୍କ ମଧ୍ୟରେ ଅନେକ ଚୁକ୍ତିନାମା ସ୍ୱାକ୍ଷରିତ ହେବ। ତେବେ ପ୍ରଧାନମନ୍ତ୍ରୀ ମୋଦୀଙ୍କ ସମ୍ମାନାର୍ଥେ ଏକ ରାଜ୍ୟ ଭୋଜନ ଆୟୋଜନ କରାଯିବ। ଏହା ପରେ ଜୁଲାଇ ୧୫ରେ ଆବୁଧାବି ଗସ୍ତ କରିବେ । ପ୍ରଧାନମନ୍ତ୍ରୀ ୟୁଏଇର ରାଷ୍ଟ୍ରପତି ତଥା ଆବୁଧାବିର ଶାସକ ଶେଖ ମହମ୍ମଦ ବିନ୍ ଜାୟେଦ ଅଲ ନାହ୍ୟାନଙ୍କ ସହିତ ଆଲୋଚନା କରିବେ।
