ଓଡ଼ିଆ ବାର୍ତ୍ତା/ ପ୍ୟୋଙ୍ଗୟାଙ୍ଗ: ଉତ୍ତର କୋରିଆର ଏକଛତ୍ରବାଦୀ ଶାସକ କିମ-ଜୋଙ୍ଗ-ଉନ ସେନାର ବରିଷ୍ଠ ଜେନେରାଲଙ୍କୁ ବରଖାସ୍ତ କରିଛନ୍ତି। ଶତ୍ରୁମାନଙ୍କ ସହ ମୁକାବିଲା କରିବାକୁ ଆରମ୍ଭ କରିଛନ୍ତି ପ୍ରସ୍ତୁତି। ଯୁଦ୍ଧର ପ୍ରତ୍ୟେକ ସମ୍ଭାବ୍ୟ ପରିସ୍ଥିତିରେ ସେନାକୁ ପ୍ରସ୍ତୁତ ରହିବାକୁ କୁହାଯାଇଛି। କେବଳ ଏତିକି ନୁହେଁ ଅସ୍ତ୍ରଶସ୍ତ୍ର ଉତ୍ପାଦନ ବୃଦ୍ଧି ଏବଂ ସାମରିକ ଅଭ୍ୟାସ ବିସ୍ତାପ କରିବାକୁ ସେ ନିର୍ଦ୍ଦେଶ ଦେଇଛନ୍ତି।
ସ୍ଥାନୀୟ ରିପୋର୍ଟ ଅନୁଯାୟୀ କିମ କେନ୍ଦ୍ରୀୟ ସାମରିକ ଆୟୋଗର ଏକ ବୈଠକରେ ଅଧ୍ୟକ୍ଷତା କରିଥିଲେ। ଏହି ବୈଠକରେ କିମ ଏପରି ସୂଚନା ଦେଇଛନ୍ତି। ଉତ୍ତର କୋରିଆର ଶତ୍ରୁମାନଙ୍କୁ ପ୍ରତିହତ କରିବା ପାଇଁ ପ୍ରତିଶୋଧ ନେବାକୁ ଯୋଜନା କରାଯାଇଥିଲା, ଯାହାର ସବିଶେଷ ତଥ୍ୟ ଏପର୍ଯ୍ୟନ୍ତ ପ୍ରକାଶ କରାଯାଇ ନାହିଁ।
କୁହାଯାଉଛି ଯେ ସେନାର ବରିଷ୍ଠ ଜେନେରାଲ ପାକ୍ ସୁ ଇଲ୍, ଜେନେରାଲ୍ ଷ୍ଟାଫ୍ ମୁଖ୍ୟଙ୍କୁ ତାଙ୍କ ପଦରୁ ହଟାଇ ଦିଆଯାଇଛି। ଜେନେରାଲ ରି ୟୋଙ୍ଗ ଗିଲଙ୍କୁ ସେନାର ବରିଷ୍ଠ ଜେନେରାଲ, ଜେନେରାଲ ଷ୍ଟାଫ ମୁଖ୍ୟ ପାକ ସୁ ଇଲଙ୍କ ସ୍ଥାନ ନେବାକୁ ମନୋନୀତ କରାଯାଇଛି। ପ୍ରତିରକ୍ଷା ମନ୍ତ୍ରୀ ଭାବରେ ତାଙ୍କର ଭୂମିକା ବଜାୟ ରଖିବେ କି ନାହିଁ ତାହା ସ୍ପଷ୍ଟ ହୋଇନାହିଁ।
ରିପୋର୍ଟରେ କୁହାଯାଇଛି ଯେ କିମ ଅସ୍ତ୍ରଶସ୍ତ୍ର ଉତ୍ପାଦନ କ୍ଷମତାକୁ ବିସ୍ତାର କରିବାର ଲକ୍ଷ୍ୟ ମଧ୍ୟ ରଖିଛନ୍ତି। ଗତ ସପ୍ତାହରେ ସେ ଅସ୍ତ୍ରଶସ୍ତ୍ର କାରଖାନା ପରିଦର୍ଶନ କରିଥିଲେ ଯେଉଁଠାରେ ସେ ଅଧିକ କ୍ଷେପଣାସ୍ତ୍ର ଇଞ୍ଜିନ, ଆର୍ଟିଲିରି ଏବଂ ଅନ୍ୟାନ୍ୟ ଅସ୍ତ୍ର ତିଆରି କରିବାକୁ କହିଥିଲେ। ଏଥି ସହିତ ସୋସିଆଲ ମିଡିଆରେ କିଛି ଚିତ୍ର ଦେଖିବାକୁ ମିଳିଛି ଯେଉଁଥିରେ କିମ ଦକ୍ଷିଣ କୋରିଆର ରାଜଧାନୀ ସିଓଲ ଏବଂ ଏହାର ଆଖପାଖ ଅଞ୍ଚଳକୁ ସୂଚାଇଥିବାର ନଜର ଆସିଛନ୍ତି।
