ଲାଞ୍ଜିଗଡ: ସ୍ବାମୀ ଆରପାରିକୁ ଯିବାର ୭ ମାସ ବିତିଗଲାଣି କିନ୍ତୁ ବିଧବା ଭତ୍ତା କିମ୍ବା ହରିଶ୍ଚନ୍ଦ୍ର ଯୋଜନାରେ ଅର୍ଥର ସହଯୋଗ ମିଳିପାରିଲାନି । ଆଖିର ଲୁହ, ପେଟର ଭୋକ, ହୃଦୟର ଅସହ୍ୟ ବେଦନା ଓ ଦାରିଦ୍ର୍ୟର କଷାଘାତରେ ସାତ ଶିଶୁଙ୍କୁ ନେଇ ଚାଲିଛି ଜୀବନ ଯାତ୍ରା । ଆମେ କହୁଛୁ ସଦେ ମାଝୀଙ୍କ କଥା । ଲାଞ୍ଜିଗଡ ବ୍ଲକ ଲାଞ୍ଜି ପଞ୍ଚାୟତର ଡାହାଣି ପଦର ଗାଁର ସ୍ବର୍ଗତ ସାଗୁ ମାଝୀଙ୍କ ବିଧବା ସ୍ତ୍ରୀ ହେଉଛନ୍ତି ସାଥେ ମାଝୀ । ମାତ୍ର ୨୮ ବର୍ଷ ବୟସରେ ସ୍ବାମୀଙ୍କୁ ହରାଇ ପୁରା ଭାଙ୍ଗି ପଡିଥିଲେ ସଦେ । ଏପଟେ ସାତୋଟି କୁନୀ କୁନୀ ଶିଶୁଙ୍କ କରୁଣ ମୁହଁ । ସେମାନଙ୍କ ମୁହଁରେ ଆହାର ଦେବାକୁ ଘରେ କିଛି ନାହିଁ । ଦିନ ମଜୁରିଆ ସ୍ବାମୀଙ୍କ ସଞ୍ଚିତ କିମ୍ବା ସ୍ଥାବର ଆସ୍ଥାବର ସମ୍ପତ୍ତି କିଛି ନଥିଲା । ଆହା ସାହା ହେବାକୁ ମଧ୍ୟ କେହି ନାହିଁ । ମାଟି, ଝାଟି ଘରେ ସାତ ଶିଶୁଙ୍କୁ ନେଇ ପଡି ରହିଲେ ଅସହାୟ ସଦେ । ପର ପାଖରେ ଯାଇ କାମଦାମ କରି ଯାହା ପାଆନ୍ତି ସେଥିରେ କଷ୍ଟେ ମଷ୍ଟେ ଚଳିଯାଆନ୍ତି । ସମୟ ସମୟରେ ଭୋକରେ ବି ରହିବାକୁ ହୁଏ । ସଦେଙ୍କ ସାତ ସନ୍ତାନ ମଧ୍ୟରେ ୪ ପୁଅ ବଡ଼ପୁଅ ପଣ୍ଡା ମାଝୀ(୯), କରୁଣା ମାଝୀ(୮), ପଞ୍ଚୁ ମାଝୀ(୭), ଗଉଡ଼ ମାଝୀ(୬) ଝିଅ ମାନଙ୍କ ମଧ୍ୟରୁ ସନନ୍ତି ମାଝୀ(୫), ଆରତୀ ମାଝୀ(୪) ଓ ତିନି ମାସର ଶିଶୁ କନ୍ୟା ଯିଏକି ଜନ୍ମ ହୋଇଥିଲେ ମଧ୍ୟ ନିଜ ବାପାକୁ ଦେଖି ପାରିନଥିଲେ।ଏମାନଙ୍କୁ ନେଇ ଚାଲିଛି ସଦେଙ୍କ ସଂସାର । ତେବେ ସବୁଠାରୁ ପରିତାପର ବିଷୟ ହେଉଛି ତାଙ୍କୁ ବିଧବା ଭତ୍ତା ମିଳିନାହିଁ କି ସାତ ଶିଶୁଙ୍କ ମଧ୍ୟରୁ ୪ ଜଣଙ୍କୁ ପଞ୍ଚାୟତ ପକ୍ଷରୁ ପିଡ଼ିଏସ ଚାଉଳ ମଧ୍ୟ ମିଳୁନାହିଁ । ଏ ସମନ୍ଧରେ ସଦେ ନିଜ କୁନି କୁନି ସନ୍ତାନକୁ ଛାଡି ପଞ୍ଚାୟତ କି ବ୍ଲକ କର୍ତ୍ତୁପକ୍ଷଙ୍କ ଦ୍ବାରସ୍ଥ ହୋଇ ପାରୁନାହିଁ । ଭାଗ୍ୟକୁ ଆଦରି ଭଙ୍ଗା କୁଡିଆରେ ବିତୁଛି ଏହି ଅସହାୟ ମହିଳାଙ୍କ ଦିନ । ସଦେଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବାପାଇଁ ଡାହାଣୀ ପଦର ଗ୍ରାମ ସମେତ ଅଞ୍ଚଳବାସୀ ଦାବି କରିଛନ୍ତି।