ଓଡ଼ିଆ ବାର୍ତ୍ତା/ କଳାହାଣ୍ଡି (ଲିଙ୍ଗରାଜ ମିଶ୍ର): ଶେଷରେ ନର୍ଲା କାହିଁକି ସାରା ଓଡ଼ିଶାର ଚାଷୀଙ୍କ ଆକୁଳ ନିବେଦନ ଶୁଣିଲେ ଠାକୁର । ବାତ୍ୟା ସିତ୍ରାଙ୍ଗ ବାଙ୍ଗଳାଦେଶ ଦେଶକୁ ମୁହାଇଲା । ବଞ୍ଚିଗଲେ ଓଡ଼ିଶା ଚାଷୀ କୂଳ ।ବାତ୍ୟା ପ୍ରଭାବରେ କେବଳ ଯେ, ଚାଷୀ କୂଳର କ୍ଷତି ହୋଇ ଥାନ୍ତା ତା ନୁହଁ । ଏଥିରେ ଗରୀବ, ଦୀନ, ଦୁଃଖୀ ମାନଙ୍କ ଘର ଦ୍ୱାର ମଧ୍ୟ ଭାଙ୍ଗି ବେସାହାରା ହୋଇ ପଡ଼ିଥାନ୍ତେ ଲୋକେ । କଳାହାଣ୍ଡି ଜିଲ୍ଲା ନର୍ଲା ଅଞ୍ଚଳର ଲୋକଙ୍କ ମନରୁ ଏଯାଏଁ ଲିଭିନି ଫାଇଲିନ୍ ଓ ହୁଡହୁଡ ବ୍ୟାତ୍ୟାର ଆତଙ୍କ । ଠିକ୍ ବିଜୟା ଦଶମୀ ବେଳେ “ହୁଡହୁଡ୍” ଆସିଲା ଆଉ ନର୍ଲାରେ ତାଣ୍ଡବ ଲିଳା ରଚିଥିଲା । ବିଶେଷ କରି ଚଷୀକୁଳର ଅନେକ କ୍ଷୟକ୍ଷତି ହେଲା । ତା’ ପରେ ପରେ ଆସିଲା “ଫାଇଲିନ୍” ସେଥିରେ ମଧ୍ୟ ଅଞ୍ଚଳର ଚାଷୀକୁଳର ମେରୁଦଣ୍ଡ ଦୋହଲିଗଲା । ଏଣୁ ନର୍ଲା ଅଞ୍ଚଳର ଜନସାଧାରଣ ବାତ୍ୟାର ନାଁ ଶୁଣିଲେ ଆତଙ୍କିତ ହୋଇପଡନ୍ତି । ଚଳିତ ବର୍ଷ ଧାନ ପାଚିଲା ବେଳକୁ “ସିତ୍ରାଙ୍ଗ” ନାମଧାରୀ ବାତ୍ୟା ଆସୁଥିବାର ଖବର ଶୁଣିବା ପରେ ଲୋକେ ଆତଙ୍କିତ ହୋଇ ପଡ଼ିଥିଲେ । ନର୍ଲା ଏକ କୃଷି ପ୍ରଧାନ ଅଞ୍ଚଳ ହୋଇଥିବା ବେଳେ ନର୍ଲା ଅଞ୍ଚଳରେ ଜଳସେଚନର ସୁବିଧା ନଥିବାରୁ ଏଠାକାର ଚାଷୀ ଇନ୍ଦ୍ର ଦେବତାଙ୍କୁ ଭରଷା କରି ଚାଷ କରିଥାନ୍ତି । ଜଳସେଚନର ସୁବିଧା ନଥିବାରୁ ପ୍ରତିବର୍ଷ ହୀନ ବୃଷ୍ଟି ଯୋଗୁଁ ବାରମ୍ବାର ମରୁଡିର କଷାଘାତରେ ଏଠାକାର ଚାଷୀଙ୍କ ମେରୁଦଣ୍ଡ ଭାଙ୍ଗି ପଡିଛି । ଅନ୍ୟପକ୍ଷେ ଚଳିତ ବର୍ଷ ଶେଷ ଭାଗରେ ଭଲ ବର୍ଷା ହୋଇ ଥିବାରୁ ଚାଷୀ ଆଶା ବାନ୍ଧି ବସିଥିଲେ ଏଥରକ ଭଲ ଫସଲ ହେବ ଓ ନର୍ଲା ଚାଷୀ ନିଜ କଷ୍ଟାର୍ଜିତ ଫସଲ ଗଣ୍ଡାକ ବିକି ଭଲ ଦୁଇ ପଇସା ପାଇବେ । ଯାହାତ ରୋଗ ପୋକ ଦାଉରୁ ଖର୍ଚ୍ଚାନ୍ତ ହୋଇ ଚାଷ ଗଣ୍ଟାକ ବଞ୍ଚାଇଛନ୍ତି । ଏହା ଉପରେ ପୁଣି ବାତ୍ୟାର ତାଡନା । ଏବେ କ୍ଷେତରେ ପାଚିଲା ଧାନ ଲହଡି ମାରୁଛି । ଅଳ୍ପ ସମୟ ଅବଧିର ଧାନ ସବୁ ପାଚି ସାରିଥିବା ବେଳେ କିଛି ଚାଷୀ ଧାନ କାଟି ସାରିଥିବା ବେଳେ କେତେକ ଚାଷୀ ଧାନ କାଟିବା ଆରମ୍ଭ କରିବାକୁ ଯାଉଛନ୍ତି । ଆନ୍ଧ୍ର ଓ ପଶ୍ଚିମ ବଙ୍ଗକୁ ମୁହାଁଇବାକୁ ଯାଉଥିବା ବାତ୍ୟା “ସିତ୍ରାଙ୍ଗ” ଓଡିଶାରେ ଅବପାତ ହେବ ବୋଲି ପାଣିପାଗ ବିଭାଗ କହିଥିଲା । ଏହାକୁ ନେଇ ଛାନିଆ ହୋଇ ପଡ଼ିଥିଲେ ନର୍ଲା ଅଂଚଳର ଚାଷୀ । କେବଳ ପାଚିଲା ଧାନ ନୁହଁ । ଏହା ସାଙ୍ଗକୁ ନର୍ଲା ଅଞ୍ଚଳର ଅର୍ଥକାରୀ ଫସଲ କପା ଚାଷ ମଧ୍ୟ ସମୂଳେ ଧ୍ୱଂସ ହୋଇ ଯାଇଥାନ୍ତା । ହେଲେ ଠାକୁରେ ଚାଷୀଙ୍କ ଗୁହାରୀ ଶୁଣିଲେ । ବାତ୍ୟା ସତ୍ରାଙ୍ଗ ଦକ୍ଷିଣପଶ୍ଚିମ ମୁହାଁ ହୋଇ ବାଂଲାଦେଶ ଚାଲିଯିବା ସହ ସେଇଠି ତାଣ୍ଡବ ରଚିଲା। ଅବଶ୍ୟ ଏହାର ଆଂଶିକ ପ୍ରଭାବରେ ଓଡିଶାର ଉପକୂଳବର୍ତ୍ତୀ କେତେକ ସ୍ଥାନରେ ବର୍ଷା ମଧ୍ୟ ହେଲା । ହେଲେ ଓଡିଶା ଚାଷୀଙ୍କ ଏଥିରେ କୌଣସୀ କ୍ଷୟ କ୍ଷତି ହୋଇ ନଥିବା ଜଣା ପଡ଼ିଛି । ଏବେ ଆରମ୍ଭ ହୋଇ ଯାଇଛି ଧାନ ଚାଷ ଅମଳର ସିଜନ । ମୌଷୁମୀ ମଧ୍ୟ ପ୍ରତ୍ୟାବର୍ତ୍ତନ କରି ଯାଇଥିବା ପାଣିପାଗ ବିଭାଗ ସୂଚନା ଦେଇଛି । ବାତ୍ୟା ସତ୍ରାଙ୍ଗ ଆଶଙ୍କା ଟଳି ଯାଇଥିବା ବେଳେ ଚାଷ ଅମଳ ସମୟରେ ଆଉ ବର୍ଷାର ଭୟ ନଥିବାରୁ ଚାଷୀ ଏବେ ଖୁସ।
